„Ættum að ná yfir 20 milljónum notenda í þessari viku“

„Við gáfum út leikinn fyrir sex mánuðum og ættum að ná yfir 20 milljónum notenda í þessari viku,“ segir Þorsteinn Baldur Friðriksson, stofnandi og forstjóri Plain Vanilla, í viðtalsþætti á bandarísku sjónvarpsstöðinni CNBC.

Plain Vanilla stendur á bak við QuizUp sem er sá iPhone-farsímaleikur sem hefur vaxið hraðast í sögunni. QuizUp kom síðan út fyrir Android stýrikerfið fyrr á þessu ári.

„Þetta er bara eitt af þessum ævintýrum. Við höfðum verið að vinna að QuizUp í um tvö ár áður en við gáfum leikinn út. Við höfðum alltaf trú á því að þetta gæti orðið nokkuð stór leikur en viðtökurnar hafa verð mun betri en okkur gat dreymt um.“

Áhættufjárfestingafyrirtækið stórtæka Sequoia Capital keypti sig inn í fyrirtækið fyrir hátt í tvær milljónir dala áður en QuizUp var hleypt af stokkunum.

Þorsteinn talar töluvert um samstarf Plain Vanilla við stórfyrirtæki á borð við Coca Cola og Google. 

„Þar sem leikurinn er aðeins fyrir farsíma í dag eru auglýsingamöguleikarnir ekki nægilega spennandi að okkar mati. Okkur hugnast illa þessir auglýsingaborðar sem birtast á skjánum í símanum þínum. Því höfum við verið að skoða aðra möguleiki með fyrirtækjum eins og Coca Cola og Google.“

Viðtalið við Þorstein má sjá hér að neðan.