Ungir forritarar fá að heimsækja CCP

Fyrirtækin Skema og CCP hafa undirritað samstarfssamning um reglulegar heimsóknir barna á aldrinum sex til sextán ára í höfuðstöðvar CCP að Grandagarði í Reykjavík.

Þetta kemur fram í tilkynningu frá Skema. Þar segir markmiðið með samstarfinu annars vegar vera það að kynna möguleg atvinnutækifæri fyrir tæknifólki og forriturum framtíðarinnar og að styrkja upplýsingatækniðnaðinn á Íslandi með öflugu samstarfi og uppbyggilegum verkefnum.

Fyrirtækið Skema var stofnað árið 2011 og miðar að því að kenna börnum forritun á unga aldri. Hópur barna sem setið hefur námskeið hjá fyrirtækinu hefur í lok hvers námskeiðs fengið tækifæri til að heimsækja höfuðstöðvar CCP. Nokkur hundruð börn hafa þegar heimsótt höfuðstöðvarnar á vegum Skema og stefnir í að hundruð til viðbótar fái til þess tækifæri.

Næstu heimsóknir fara fram 26. og 28. maí og er nú þegar fullt í þær báðar.