Söfnuðu sér fyrir hjólakerru með ýmsum brögðum

Nokkrir hressir strákar sem búa saman á Barðastöðum í Grafarvogi ákváðu að safna pening fyrir sérhönnuðu hjóli frá Danmörku til að rúnta um stræti borgarinnar í sumar og heilsa upp á fólkið. Þeir brugðu á það ráð að smíða og selja matjurtagarða, safnhauga, fuglahús og fleira fyrir fólk og leikskóla á höfuðborgarsvæðinu. Strákarnir segjast vera með matjurtagarða út í garði hjá sér og að þeir séu gjörsamlega að kafna úr grænmeti þessa dagana.



Söfnunin skilaði vel yfir 130.000 krónum. Húsasmiðjan studdi þá við efniskaup og Eimskip sér um að flytja hjólið til landsins. „Húsasmiðjan hefur verið algjör snilld og hjálpað okkur mikið. Coca-Cola og Íslandsbanki munu hjálpa okkur að draga hjólið í land og splæsa í mótor á hjólið fyrir allar brekkurnar okkar á Íslandi,“ segja strákarnir. 



„Þessi hjól eru gríðarlega vinsæl þarna úti, þetta eru algjörar lúxuskerrur. Þú finnur hvergi betri stað til þess að sitja á en í boxinu framan á hjólinu,“ segir Hafsteinn Helgi, starfsmaður á Barðastöðum. „Við hlökkum svo sannarlega til þetta er frábær viðbót við dagsvenjur okkar að hjóla brosandi í allt sumar. Nú bíðum við bara spenntir eftir að hjólið komi í Reykjavíkurhöfn.“

Hægt er að fylgjast með á Facebooksíðunni hér.