Audi A9 flaggskip á LA Auto Show

Þrátt fyrir að Audi A8 sé mjög stór fólksbíll ætlar Audi að framleiða enn stærri fólksbíl og vafalaust með enn meiri lúxus. Með hækkandi tölu í nafni Audi bíla fylgir yfirleitt meiri tækni og þægindi, auk stærðar.

Þessi bíll verður flaggskip Audi og ber nafnið A9. Að þessum bíl hefur verið ýjað í langan tíma, en þar sem Audi hefur nú sent frá sér „teaser“ myndir af bílnum og hefur að auki gefið það upp að hann verði sýndur á bílasýningunni í Los Angeles í næsta mánuði, má telja líklegt að af smíði hans verði.

Audi hefur einnig gefið upp að bíllinn verði byggður á sama undirvagni og næsta kynslóð A8 bílsins. Með þessum bíl hefur Audi vafalaust hugsað sér að vera samkeppnisfærari við S-Class bílinn frá Mercedes Benz sem fá má í mörgum útfærslum og mishlaðinn lúxus.