Íslenskt vatn selt í Hong Kong

Icelandic Water Holdings hf, sem flytur út vatn undir merkinu Icelandic Glacial, og dreifingarfyrirtækið Remfly HongKong Ltd frá Hong Kong hafa gert með sér samning um dreifingu á Icelandic Glacial en sala á vatninu hefur þegar hafist í Hong Kong.

„Okkur er mikil ánægja að tilkynna að Remfly HongKong Ltd. er nýr dreifingaraðili okkar í Hong Kong“ sagði Jón Ólafsson, stjórnarformaður og stofnandi Icelandic Water Holdings efh í tilkynningu frá fyrirtækinu.

„Remfly HongKong Ltd er dótturfyrirtæki Remfly Wines & Spirits Ltd, dreifingaraðila okkar í Macau en fyrirtækið er leiðandi á drykkjavörumarkaðinum í Austur Asíu. Samstarf okkar hefur gengið mjög vel í Macau og við höfum trú á að samvinna okkar í Hong Kong muni styrkja samstarf okkar enn frekar og leiða til markvissari dreifingu á Icelandic Glacial á þessum mörkuðum. Við erum stolt að geta boðið íbúum og gestum Hong Kong upp á margverðlaunaða gæðavatnið okkar, Icelandic Glacial.“

Song Fai Leong, stofnandi og eigandi Refmly Wines & Spirits Ltd. segir samstarf fyrirtækjanna falla vel að áherslum Remfly.

„Icelandic Glacial hefur frábært orðspor og í fyrsta skiptið sem ég bragðaði það vissi ég að við yrðum að bjóða upp á þetta einstaka vatn í Macau og Hong Kong.“

Icelandic Glacial er nú selt á tuttugu mörkuðum víða um heiminn. Auk Hong Kong er Icelandic Glacial til sölu í Bandaríkjunum, Kanada, Bretlandi, Frakklandi, Hollandi, Belgíu, Luxemborg, Rússlandi, Hvíta-Rússlandi, Kalíníngrad, Úkraínu, Kína, Taiwan, Macau, Tælandi, Suður-Kóreu, Singapore, Perú og á Íslandi.