Farþegum fjölgar um tólf prósent

Í nóvember flutti Icelandair um 161 þúsund farþega í millilandaflugi og voru þeir 12% fleiri en í nóvember á síðasta ári.

Þetta kemur fram í tilkynningu frá Icelandair Group hf. Framboðsaukning á milli ára nam 10% og sætanýting var 76,9% samanborið við 74,0% á sama tíma í fyrra. Farþegum fjölgaði mest á N-Atlantshafsmarkaðinum eða um 21,9%.

Farþegar í innanlandsflugi og Grænlandsflugi voru 21 þúsund í nóvember og fækkaði um 1% á milli ára. Sætanýting nam 72,5% og hækkaði um 1,1 prósentustig frá síðasta ári.

Seldum blokktímum í leiguflugi fækkaði um 20% á milli ára. Fraktflutningar stóðu í stað á milli ára. Herbergjanýting á hótelum félagsins var 71,0% samanborið við 65,5% í nóvember í fyrra.