Grófu leið fyrir viðskiptavinina

Mikill skafl myndaðist fyrir utan einn innganginn á verslun Byko í Kópavogi í óveðrinu sem skall á höfuðborgarsvæðið í dag. Starfsmenn Byko dóu þó ekki ráðalausir. Þeir grófu göng fyrir viðskiptavinina, svo þeir kæmust að innganginum.

„Já, það hefur eiginlega verið þannig að einn maður hefur bara verið í þessu í dag,“ segir Reynir Páll Magnússon, starfsmaður Byko. „Annars er búið að vera heldur rólegt að gera í dag, enda ekkert ferðaveður. Þó hafa nokkrir viðskiptavinir komið hingað og verslað, sem er auðvitað hið besta mál. En á svona dögum, þegar rólegt er að gera vegna veðurs, nýtum við tímann í að sinna öðrum þörfum verkum.“

Reynir segir mikinn snjó safnast saman fyrir framan einn inngang verslunarinnar, þar sem gengið er inn í timbursöluna. „Já, það er mikill skafrenningur og það skefur hérna fyrir dyrnar. Það hefur líka skafið vel inn í skýli og fleira. Það hefur verið nóg að gera í snjómokstri.“

Hér að neðan má sjá myndir frá Byko í dag.