Búsetugjöld íbúða Búseta í Reykjavík hækka ekki

Ekki stendur til að hækka búsetugjöld íbúða Búseta í Reykjavík. Búseti í Reykjavík og Búseti á Norðurlandi eru óskyld félög með mismunandi samþykktir og reglur þrátt fyrir að starfa samkvæmt sömu lögum um húsnæðissamvinnufélög. Búseti í Reykjavík stendur vel fjárhagslega og eigið fé samstæðu er 21% samkvæmt sex mánaða ársreikningi. Þetta kemur fram í tilkynningu frá Búseta í Reykjavík.

Tilefni tilkynningarinnar er frétt í Fréttablaðinu í dag þar sem fram kemur að Búseti á Norðurlandi þurfi að grípa til þess að hækka búsetugjöld. Hafi það valdið misskilningi hjá einhverjum hjá Búseta í Reykjavík.

„Það er miður að Búseti á Norðurlandi þurfi að grípa til þess að hækka búsetugjöld en húsnæðissamvinnufélögin fengu ekki skuldaleiðréttingu, líkt og önnur eignarform. Lauslega má áætla að skuldaleiðrétting fyrir Búseta í Reykjavík hefði þýtt um 1.100 milljóna króna lækkun skulda, og þar með lækkun greiðslubyrði íbúa.  Það er leitt að ekki hafi verið tekið tillit til þessa hóps í samfélaginu sem einnig varð fyrir margumræddum forsendubresti enda verðtryggð lán uppistaða allra fasteignalána á Íslandi,“ segir í tilkynningunni.

Ætla megi að þegar tekinn sé saman heildarfjöldi allra íbúa í búseturéttarfélögum, leigufélögum sbr. Félagsstofnun stúdenta og félagslegar íbúðir sveitarfélaga, öll öldrunarfélögin með mismunandi lán og samningsform auk annarra fasteignafélaga, þá hafi um fjórðungur íbúa þessa lands verið sniðgenginn.