Tvær milljónir manna hafa streymt plötunni

„Við fengum á dögunum staðfestingu á að plötunni hafi verið streymt oftar en tveimur milljón sinnum á Deezer,“ segir Börkur Hrafn Birgisson, gítarleikari hljómsveitarinnar Mono Town, en fyrsta breiðskífa sveitarinnar, In The Eye of the Storm kom út á geisladiski og vínyl í vikunni.

Hún kom þó út á streymissíðunni Deezer fyrir um tveimur mánuðum og hefur fengið frábærar viðtökur, og hefur eins og fyrr segir verið streymt yfir tveimur milljón sinnum.

„Deezer er eins og Spotify nema bara stærri á meginlandi Evrópu. Samstarf okkar við þá var mjög spennandi,“ segir Börkur Hrafn.

Í kjölfarið hefur sveitin fengið athygli út um allan heim. „Við höfum ekki enn fengið uppgjör frá Deezer en við fáum greitt samkvæmt þeirra töxtum. Það sem er okkur mjög mikils virði er hins vegar það að nú er fullt af fólki út um allan heim að hlusta á plötuna. Það er rosalega verðmætt,“ segir Börkur Hrafn spurður út í arðinn af svo miklu streymi á netinu.

Platan kom út á vegum Record Records síðastliðinn þriðjudag á geisladiski og vínyli og fæst því í öllum helstu verslunum. Hljómsveitin sá sjálf um upptökur á plötunni í Reykjavík og ferðaðist svo til New York-borgar þar sem Grammy-verðlaunahafinn Michael Brauer sá um hljóðblöndun.

Sveitin stefnir á að fara með plötuna víðar og hefur í hyggju að fara í tónleikaferðalag um Evrópu með hækkandi sól. Hljómsveitin Mono Town var stofnuð árið 2007. „Sveitin hefur verið til síðan 2007. Við byrjuðum að semja tónlist og vinna að plötunni þá en þó ekki af fullum krafti fyrr en árið 2010.“

Hana skipa bræðurnir Börkur Hrafn og Daði Birgissynir ásamt Bjarka Sigurðssyni en þeir eru allir laga- og textahöfundar sveitarinnar. Þeim til aðstoðar eru meðal annars þeir Guðmundur Óskar Guðmundsson bassaleikari og Magnús Tryggvason Elíassen trommuleikari.

Mono Town hefur staðfest tvenna útgáfutónleika í tilefni af útgáfu plötunnar, annars vegar þann 3. apríl í Gamla Bíói í Reykjavík og hins vegar 12. apríl á Græna hattinum á Akureyri. „Á útgáfutónleikunum verðum við með strengjasveit og kór með okkur. Við leggjum mikið í tónleikana,“ bætir Börkur Hrafn við.

Hljómsveitin ætlar einnig að spila í Lucky Records laugardaginn 15. mars. Miðasala á útgáfutónleikana fer fram á Miði.is.

Nánari upplýsingar á vefsíðu sveitarinnar og einnig á fésbókarsíðu sveitarinnar. Einnig á Twitter.

)