"Veðrið ykkar er eiginlega glatað“

„Allt útlit myndarinnar er innblásið af Íslandi, hvort sem það er förðunin, búningarnir eða örkin sjálf,“ sagði leikstjórinn Darren Aronofsky á blaðamannafundi fyrir frumsýningu á stórmynd sinni Noah í gærkvöldi en myndin var tekin upp hér á landi sumarið 2012. Með aðalhlutverk í myndinni fara Russell Crowe, Jennifer Connelly, Anthony Hopkins og Emma Watson.

Darren er mikill Íslandsvinur og var boðið til Íslands fyrst árið 1998. Síðan hefur hann haft dálæti á landi og þjóð, þó veðrið á Íslandi sé ekki hans besti vinur.

„Veðrið ykkar er eiginlega glatað – þá fyrir að taka upp myndir. Hér getur veðrið breyst á hverri stundu eins og þið vitið en það kenndi mér sem sjálfstæðum, skæruliðakvikmyndagerðarmanni að vinna með það sem manni er gefið. Og það gerði ég og myndin varð öðru vísi fyrir vikið,“ sagði Darren um hvernig var að taka myndina upp. Hann var búinn að ganga með myndina í maganum síðan hann var þrettán ára gamall en nú er hann 45 ára.

„Þá bað kennarinn minn bekkinn um að skrifa eitthvað um frið. Ég skrifaði ljóð um Nóa og hlaut verðlaun á vegum Sameinuðu þjóðanna fyrir það. Það var í fyrsta sinn sem ég vann eitthvað á ævinni,“ sagði Darren og er spenntur fyrir því að landsmenn fái að sjá myndina.

„Ísland leikur stórt hlutverk í myndinni.“