Neytendur bjartsýnni

Íslenskir neytendur eru mun bjartsýnni á ástand og horfur í efnahags- og atvinnumálum samkvæmt Væntingavísitölu Gallup fyrir marsmánuð sem birt var í gær.

Vísitalan hækkaði um níu stig á milli febrúar og mars og mælist 94,8 stig. Samkvæmt greiningu Íslandsbanka er það hæsta gildi hennar frá því í júní í fyrra. Íslandsbanki segir að þar sem vísitalan fari ekki yfir 100 stig teljist Íslendingar þó ekki almennt bjartsýnir á ástandið.

Allar undirvísitölur hækkuðu á milli mánaða, en mest hækkaði mat neytenda á núverandi ástandi. Það hækkaði um 18 stig og mældist 54,8 stig, sem er hæsta gildi vísitölunnar frá því fyrir hrun.