Fríverslun við Kína frá og með 1. júlí

Samningur Íslands og Kína um fríverslun sem undirritaður var fyrir um einu ári tekur gildi 1. júlí næstkomandi.

Samtök verslunar og þjónustu (SVÞ) segja í fréttapósti sínum komna staðfestingu á þessu frá stjórnvöldum. Samtökin hafa verið mjög fylgjandi gerð samningsins og telja að í honum felist veruleg tækifæri fyrir íslenska verslun.

„Með gildistöku samningsins falla niður tollar af öllum algengum iðnaðarvörum sem fluttar eru til landsins frá Kína,“ segir í umfjöllun SVÞ.

Hagræðið felist hins vegar fyrst og fremst í beinum innflutningi. Það þýði að varningurinn megi ekki áður hafa verið tollafgreiddur inn í eitthvert aðildarríkja Evrópusambandsins.