Spá því að verðbólgan fari undir þolmörk

Greiningardeildir allra þriggja viðskiptabankanna og IFS greiningar telja að tólf mánaða verðbólga fari undir neðri þolmörk Seðlabankans í desember. Hagstofa Íslands birtir verðbólgutölur 19. desember.

Gangi þetta eftir mun Seðlabankinn þurfa að birta greinargerð um ástæður fyrir lítilli verðbólgu og úrbætur í þeim efnum. Verðbólgumarkmið Seðlabankans er 2,5 prósent og eru þolmörkin 1,5 prósent. Samkvæmt mælingu Hagstofunnar var verðbólgan eitt prósent í nóvember.

Greining Íslandsbanka spáir því að vísitala neysluverðs hækki um 0,3 prósent í desembermánuði frá mánuðinum á undan. Tólf mánaða verðbólga hjaðni úr 1,0 prósenti í 0,8 prósent.

IFS greining, greiningardeild Arion banka og hagfræðideild Landsbankans spá því hins vegar allar að neysluverðsvísitalan í desember hækki um 0,2 prósent og tólf mánaða verðbólga fari niður í 0,7 prósent. Samkvæmt þeirri spá yrði ársverðbólgan sú lægsta í um tvo áratugi eða síðan í desember árið 1994.

Bráðabirgðaspá hagfræðideildar Landsbankans gerir ráð fyrir 0,3 prósenta lækkun neysluverðsvísitölu í janúar, 0,2 prósenta hækkun febrúar og 0,2 prósenta hækkun í mars á næsta ári.

Gangi spáin eftir verður tólf mánaða verðbólgan 0,6 prósent í mars.