Ásta verður stjórnarformaður FME

Ásta Þórarinsdóttir hefur verið skipaður formaður fjármálaeftirlitsins. Þetta kemur fram í tilkynningu á vef fjármálaráðuneytisins en auk Ástu verða í stjórn Tómas Brynjólfsson, sem auk þess er varaformaður stjórnar FME, og Arnór Sighvatsson.

Varamenn í stjórn eru Friðrik Ársælsson, Ástríður Jóhannesdóttir og Harpa Jónsdóttir.

Ásta lauk BS gráðu í hagfræði frá Háskóla Íslands 1994 og MS gráðu í Investment Management frá City University í London 1996. Hún hefur einnig lokið prófi í verðbréfamiðlun.

Hún starfaði hjá bankaeftirliti Seðlabanka Íslands frá 1994 og síðar Fjármálaeftirlitinu allt til ársins 2005. Hún er framkvæmdastjóri Evu ehf. móðurfélags Sinnum, sem starfar á velferðarsviði.

Þá hefur hún setið í mörgum stjórnum og nefndum, samkvæmt tilkynningu frá fjármálaráðuneytinu, bæði á einkamarkaði og hjá hinu opinbera, s.s. hjá Jöklum – verðbréfum, Nýsköpunarsjóði atvinnulífsins, ISB Holding, LÍN og Yfirfasteignamatsnefnd.