Jákvæður vöruskiptajöfnuður á síðasta ári

Samkvæmt bráðabirgðatölum frá Hagstofu Íslands var 7,3 milljarða króna afgangur af vöruskiptum við útlönd í desember síðastliðnum. Þetta kemur fram í Hagsjá Landsbankans.

Þar segir að ef þær reynast haldbærar munu vöruskiptin hafa verið jákvæð á árinu 2014 upp á 5,5 ma. kr.

Það mun vera minni afgangur en undanfarin ár en á tímabilinu 2009-2013 lá hann á bilinu 40 til 120 ma. kr. Framan af árinu stefndi í að vöruskiptajöfnuðurinn yrði neikvæður fyrir árið í heild en töluverður afgangur í desember snéri þeirri þróun við.

Töluverður viðsnúningur var í vöruskiptajöfnuði í desember frá fyrra ári þegar halli mældist upp á 2,8 ma. kr. Viðsnúningurinn var því um 10 ma. kr. Þetta skýrist bæði af meiri útflutningi og minni innflutningi, sem vegur meira. Þannig jókst útflutningurinn um 3,7 ma. kr. en innflutningurinn dróst saman um 6,4 ma. kr. Útflutningsverðmæti iðnaðarvara jókst um 6,2 ma. kr. miðað við fyrra ár en frekara niðurbrot á innflutningsliðum er ekki birt í bráðabirgðatölum Hagstofunnar.

Ál fellur undir þennan lið og má gera ráð fyrir að það skýri aukninguna að hluta en álverð var 8,1% hærra í desember síðastliðnum en í sama mánuði 2013.

Innflutningsverðmæti í desember dróst saman um 6,4 ma. kr. milli ára. Innflutningur á eldsneyti og smurolíu dróst saman um 9,2 ma. kr. eða um 74%. Það skýrist bæði af lækkun eldsneytisverðs á heimsmarkaði sem lækkaði um 44% milli þessara tímapunkta en einnig af sterkara gengi krónu en gengisvísitalan var 3,5% lægri í desember en í sama mánuði árið áður.