Máli WOW air vísað endanlega frá dómi

Hæstiréttur hefur staðfest frávísun á máli WOW air vegna úthlutunar afgreiðslutíma á Keflavíkurflugvelli. Flugfélagið krafðist þess að úrskurður áfrýjunarnefndar samkeppnismála yrði felldur úr gildi en nefndin felldi úr gildi ákvörðun Samkeppniseftirlitsins um að WOW air skildi njóta forgangs við úthlutun afgreiðslutíma á flugvellinum, að því er segir í tilkynningu frá Icelandair.

„Ekkert kemur fram um það í dóminum, ráðgefandi áliti EFTA-dómstólsins eða úrskurði áfrýjunarnefndar samkeppnismála að það fyrirkomulag sem viðhaft er við úthlutun afgreiðslutíma á Keflavíkurflugvelli hafi skaðleg áhrif á samkeppni,“ segir í tilkynningunni. „Enda er þetta sama fyrirkomulag og er viðhaft alls staðar annars staðar á Evrópska efnahagssvæðinu.“

WOW air hefur talið að úthlutun afgreiðslutíma komi í veg fyrir að það geti keppt við Icelandair með því að setja upp leiðarkerfi eða tengiflug á milli Evrópu og Bandaríkjanna þar sem Keflavíkurflugvöllur er miðstöð tengiflugsins.