Honda skorar hátt sem bestu kaupin

Á hverju ári kýs News & World Report´s í Bandaríkjunum þá bíla sem blaðið telur bestu kaupin í hverjum flokki. Þetta árið voru 18 þeirra 21 bíla sem kosnir voru frá framleiðendum utan Bandaríkjanna.

Sá framleiðandi sem hlaut flest verðlaun var Honda, en bílarnir Honda Jazz, sem vann reyndar tvo flokka, Honda CR-V og Acura TLX, RDX og MDX voru taldir bestu kaupin í sínum flokki. Honda á lúxusbílamerkið Acura.

Þrír Toyota bílar unnu sína flokka, þ.e. Toyota Highlander, Toyota Camry og Lexus RX 350. Hyundai, Volkswagen og Mazda fengu tvær viðurkenningar. Volkswagen fyrir Golf og Golf GTI, Hyundai fyrir Sonata og Santa Fe og Mazda fyrir CX-9 og Mazda5. Audi A3, Subaru Outback og Nissan Murano hlutu einnig náð fyrir valnefndinni.

Einu bandarísku bílarnir sem unnu sinn flokk voru Ram 1500, Chevrolet Colorado og Chevrolet Impala. Í vali News & World Report´s er tekið mið af kostnaði við eignarhald bílanna í 5 ár og það meðalverð sem greiða þarf fyrir nýja slíka bíla.