Skörp hækkun hlutabréfa í N1

Gengi hlutabréfa í N1 hefur hækkað um 4,36 prósent það sem af er degi í Kauphöll Íslands. Heildarvelta viðskipta hefur numið 476 milljónum króna. Hlutabréf í N1 hafa því hækkað um 9,5 prósent frá miðvikudeginum 18. febrúar.

Hækkunin kemur í kjölfar uppgjörs N1 í gær en hagnaður félagsins á síðasta ári nam 1,6 milljarði króna. Þrátt fyrir hagnaðinn sagði í afkomutilkynningu að þróun heimsmarkaðsverðs á olíu undir lok ársins hafi haft neikvæð áhrif á afkomu félagsins.

Þá var einnig tilkynnt um að Eggert Benedikt Guðmundsson myndi láta af störfum sem forstjóri N1 og Eggert Þór Kristófersson, fjármálastjóri N1, myndi taka við starfinu.