Marple-málið: Aðalmeðferð í september

Fyrirtaka fór fram í Marple-málinu svokallaða í morgun í Héraðsdómi Reykjavíkur. Ákveðið var að aðalmeðferð málsins færi fram þann 7. september næstkomandi og er áætlað að hún taki tvær vikur. Þetta staðfestir Hörður Felix Harðarson, verjandi Hreiðars Más Sigurðssonar, í samtali við Vísi.

Fjórir eru ákærðir í málinu. Hreiðar Már Sigurðsson, Guðný Arna Sveinsdóttir og Magnús Guðmundsson, fyrrum stjórnendur Kaupþings og Kaupþings í Lúxemborg, eru sökuð um fjárdrátt og yfirhylmingu.

Sú háttsemi sem þeim er gefið að sök vegna fjárdráttar, miðaði að því að færa um 8 milljarða króna úr sjóðum Kaupþings til félagsins Marple í eigu Skúla Þorvaldssonar án þess að lögmætar viðskiptalegar ástæður lægju þar að baki.

Skúli Þorvaldsson, eigandi félagsins Marple Holding, er ákærður aðallega fyrir hylmingu með því að halda ólöglega þessum peningum og taka þannig þátt í auðgunarbroti.

Fjórmenningarnir neituðu allir sök við þingfestingu málsins í september síðastliðnum.