Harpa semur við Tix Miðasölu

Harpa tónlistar- og ráðstefnuhús hefur gert samning við Tix Miðasölu um notkun á miðasölukerfi Tix.is. Þetta kemur fram í tilkynningu frá Tix.

Um er að ræða langtímasamning sem felur í sér uppsetningu á miðasölukerfi Tix.is í afgreiðslu miðasölu Hörpu og miðasölu á netinu sem fram fer á harpa.is og tix.is. Stefnt er að því að notkun kerfisins hefjist í byrjun sumars og tekur þá við af því kerfi sem hefur verið í notkun frá opnun hússins.

Með samstarfinu við Tix verður þjónusta við miðakaupendur á netinu aukin til muna og verða áskriftaraðir Sinfóníunnar einnig fáanlegar í netsölu. Nýtt miðasölukerfi mun einnig gefa kost á sölu á varningi fyrir viðburði sem í gangi eru hverju sinni, s.s. boli og geisladiska.

„Ég er virkilega ánægður með þennan samning við Hörpu og það traust sem þetta stærsta tónleikahús hér á landi sýnir okkar unga fyrirtæki. Harpa er eftirsóttasti samstarfsaðilinn á miðasölumarkaðnum á Íslandi og það er mikill heiður að húsið sé nú komið í hóp okkar viðskiptavina. Nútíma miðasala á að vera hagkvæm, tæknilega sveigjanleg og til hagsbóta fyrir bæði tónleikahaldara og gesti og það ætlum við að tryggja,“ segir Sindri Már Finnbogason, framkvæmdastjóri Tix Miðasölu.

Tix Miðasala var stofnuð í lok september 2014 og var miðasöluvefur fyrirtækisins opnaður formlega þann 1. október. Á vefnum er hægt að nálgast miða á hina ýmsu viðburði, eins og Iceland Airwaves, Secret Solstice, Eistnaflug, viðburði í Hljómahöll og Bíó Paradís svo eitthvað sé nefnt.

Stofnandi og eigandi Tix Miðasölu er Sindri Már Finnbogason. Sindri hefur yfir 12 ára reynslu í miðasölu á netinu, bæði hér á Íslandi og í Skandinavíu hjá fyrirtækinu Billetlugen A/S þar sem hann kom að uppsetningu á miðasölukerfum fyrir Sinfóníuna í Kaupmannahöfn, Norsku óperuna, Tónlistarhúsið í Árhúsum, Tónlistarhúsið í Stavanger og fleiri.

Miðasölukerfið sem notað verður af Hörpu er alfarið þróað af Tix Miðasölu og er nú unnið að nýrri útgáfu á vefnum þar sem ýmsar nýjungar verða í boði fyrir miðakaupendur.

Tix Miðasala ehf. er til húsa í Grjótagötu 7 í Reykjavík.