Farþegum Strætó fjölgar

Farþegum Strætó fjölgaði um tæp fimm prósent milli áranna 2013 og 2014. Fjöldi farþega hefur vaxið á síðustu árum og er fjölgun þeirra rúmlega 25 prósent frá árinu 2010. Strætó spáir því að farþegar verði um 16 milljónir í loks árs 2023. Þetta kemur fram í tilkynningu frá Strætó.

Ítarleg talning á farþegum í leiðarkerfi Strætó fer fram í október á ári hverju. Upplýsingar um farþegatalningu októbermánaðar sýna hvernig fjöldi farþega er á mismunandi leiðum á hverjum tíma eftir stoppustöðvum og skiptistöðvum. Upplýsingarnar eru svo nýttar við skipulagningu leiðarkerfis Strætó.

Í tilkynningunni segir að ýmsar ástæður séu fyrir aukningu farþega. Það sé meðal annars aukin tíðni í akstri, viðhorfsbreyting almennings gagnvart almenningssamgöngum, betra leiðarkerfi, nýrri vagnar og nema- og samgöngukort. Þá sé samningur ríkis og sveitarfélaga um eflingu almenningssamgangna á höfuðborgarsvæðinu einnig mikilvægur þáttur í fjölgun farþega.