Götur borgarinnar gleðja bílrúðusala

Bílrúðubrot í borginni eru helmingi meiri nú en á sama tíma í fyrra. Bílrúðusali áætlar að malbiksskemmdir hafi frá áramótum kostað milljón á dag í auknum rúðuviðgerðum.

Þegar malbikið brotnar upp situr eftir urmull af smásteinum á götunum sem þeytast svo upp undan dekkjum bílanna. Afleiðingin er fleiri heimsóknir bíleigenda til fyrirtækja sem sinna bílrúðuviðgerðum.

Fyrirtækið Orka ehf. hefur um áratugaskeið annast bílrúðuskipti og viðgerðir og er jafnframt einn helsti bílrúðuinnflytjandi landsins. Eigandinn, Páll Helgi Guðmundsson, segist svo sem ekki gráta ástandið. 



„Þetta er bara vertíð,“ segir Páll og kveðst aldrei hafa kynnst öðru eins. „Þú sérð göturnar. Það er allt í sprungum og upplausn og grjótið um allt. Það er afleiðingin.“

Hjá Orku segjast þeir aldrei hafa haft jafnmikið að gera. „Það er svona 50% aukning frá áramótum í bílrúðuísetningum,“ segir Páll.

Ef menn eru tryggðir fyrir framrúðubrotum bætir tryggingafélag venjulega 85 prósent tjónsins, en á endanum lendir kostnaðurinn auðvitað á bíleigendum. Og hvert tjón er dýrt. Rúða með ísetningu kostar frá 50-60 þúsund krónum og yfir 100 þúsund krónur, og þaðan af meira eftir rúðunni, segir Páll. 

Í þeim tilvikum þar sem sár eftir stein er bara ein lítil stjarna er hægt að lagfæra það með sérstakri tækni, sem kostar mun minna. 

En hvað þýðir 50 prósenta aukning bílrúðutjóna í heildarkostnað fyrir samfélagið? 

„Án ábyrgðar, þá er það svona 800 þúsund til ein milljón á dag,“ áætlar Páll viðbótarkostnaðinn á degi hverjum vegna aukinna bílrúðubrota frá áramótum.