Myndbandaleigur heyra sögunni til: Algjört hrun frá aldamótum

Sala leigumynda frá útgefendum til myndaleiga hefur dregist saman um 98 prósent frá síðustu aldamótum. Samsvarandi samdráttur hefur orðið á útleigu frá myndaleigum. Þetta kemur fram í gögnum Hagstofunnar.

Árið 2001 gekk sala leigumynda best en þá seldu útgefendur laust innan við 104 þúsund eintök myndbanda og mynddiska til myndaleiga, samanborið við 2.586 eintök á síðasta ári.

Hjá Hagstofunni kemur fram að á síðasta ári voru gefnir út 571 titlar leigu- og sölumynda á vegum stærstu útgefenda. Þar af voru sölumyndir 434 og leigumyndir 137. Fjöldi útgefinna sölumynda hefur, miðað við þetta, dregist saman um þriðjung frá því að útgáfan var sem mest, sem var árið 2011.

Útgáfa leigumynda hefur dregist saman nær samfellt frá árinu 2004; samtals um 84 prósent.

Samkvæmt Hagstofunni, miðað við áætlaða útleigu árið 2014, má gera ráð fyrir því að hver einstaklingur hafi leigt sér mynd einu sinni. Í kringum aldamótin tók hver einstaklingur mynd á leigu tíu til ellefu sinnum.

Inni í tölunum er hvorki leiga á myndum í gegnum VOD-þjónustur eða í gegnum netið.