Þrettán fyrirtæki framúrskarandi í stjórnunarháttum

Þrettán fyrirtæki fengu viðurkenningu sem Fyrirmyndarfyrirtæki í góðum stjórnarháttum á ráðstefnu undir sama nafni sem haldin var í hátíðarsal Háskóla Íslands í gær.

Viðurkenningin er byggð á leiðbeiningum um stjórnarhætti fyrirtækja sem Viðskiptaráð Íslands, Samtök atvinnulífsins og Nasdaq á Íslandi gefa út.

Fyrirtæki sem þess óska gefst tækifæri til að undirgangast formlegt mat á starfsháttum stjórnar og stjórnenda. Rannsóknarmiðstöð um stjórnunarhætti við HÍ sér um framkvæmd matsins.

Ráðstefnan er haldin af Rannsóknarmiðstöð um stjórnarhætti við Háskóla Íslands í samstarfi við Nasdaq OMX Iceland, Viðskiptaráð, Samtök atvinnulífsins og Viðskiptafræðideild Háskóla Íslands. Þetta er í annað skiptið sem þessi ráðstefna er haldin. Aðalræðumenn voru Per Lekvall, einn helsti sérfræðingur Svíþjóðar í stjórnarháttum og Magnus Billing, forseti kauphallarinnar Nasdaq OMX í Stokkhólmi. Ólöf Nordal, innanríkisráðherra opnaði ráðstefnuna en gestir ráðstefnunnar voru á annað hundrað segir í tilkynningu frá rannsóknarmiðstöðinni.

 

Eftirfararandi fyrirtæki voru verðlaunuð:

Advania hf.

Fjarskipti hf.

Greiðsluveitan ehf.

Íslandsbanki hf.

Íslandspóstur hf.

Íslandssjóðir hf.

Landsbankinn hf.

Landsbréf hf.

Lánasjóður sveitarfélaga ohf.

Mannvit hf.

Nýherji hf.

Stefnir hf.

VÍS hf.