Liðsfélagi Ragnars Sigurðssonar í Krasnodar stútar Nissan GT-R bíl sínum

Þeir sem horfðu á síðasta heimsmeistaramót í knattspyrnu muna af til vill eftir Andrey Yeshchenko í rússneska landsliðinu. Hann er vafalaust betri fótboltamaður en ökumaður.

Um daginn afrekaði hann það að gereyðileggja Nissan GT-R ofurbíl sinn með því að aka honum á ljósastaur í heimalandinu og það náðist á mynd, eins og hér sést. Af myndunum að dæma er hreint magnað að hann skildi sleppa frá þessum hildarleik óskaddaður, en sama verður ekki sagt um bíl hans, sem er gerónýtur.

Andrey ók bíl sínum á um 170 km hraða þar sem hámarkshraði er 50, svo ef til vill er ekki nema von að illa fór. Andrey Yeshchenko spilar nú hjá Kuban Krasnodar og er því liðsfélagi Ragnars Sigurðssonar landsliðsmanns Íslands.

Andrey er í láni frá Anzhi, öðru sterku rússnesku liði. Hann hefur örugglega efni á að kaupa sér annan bíl, en kannski ekki eins öflugan í þetta skipti.