Bjórgarður við Höfðatorg

Fosshótel Reykjavík mun opna Bjórgarðinn í júní og verður staðurinn við Höfðatorg. Hann mun taka 120 manns í sæti en fram kemur á vef Veitingageirans að sérstök áhersla verði lög á vítt úrval af bjór ásamt mat undir áhrifum götumenningar í New York.

„Þetta verður fyrsti staðurinn á Íslandi sem sérhæfir sig í að para mat og bjór enda teljum við að bjór upphefji allar máltíðir,“ segir Loftur Hilmar Loftsson, rekstarstjóri, í samtali við Veitingageirann en hann undirbýr nú opnun staðarins.

Hann segir að áhersla verði lögð á árstíðarbundinn bjór. Við Höfðatorg er að rísa stærsta hótel á Íslandi og verður það 17 þúsund fermetrar og verða 340 hótelherbergi í húsinu.

„Okkar markmið er að kitla skynfæri og bragðlaukana hjá gestum svo þeim finnist að þeir verði að koma aftur,“ segir Loftur en um einn mánuður er í opnun staðarins.