Telja hækkun persónuafsláttar koma niður á menntunarstigi

„Skattkerfi sem eru of stigvaxandi draga úr hvata einstaklinga til að fjárfesta í aukinni menntun, sérfræðiþekkingu og annarri reynslu sem er verðmæt fyrir samfélagið,“ segir í áliti Viðskiptaráðs Íslands um hugmyndir um að hækka persónuafslátt til þess að liðka fyrir kjaraviðræðum.



Mbl greindi frá því að ríkisstjórnin hefði viðrað hugmyndir við aðila vinnumarkaðarins að fækka skattþrepum úr tveimur í þrjú og hækka per­sónu­afslátt í 65 þúsund krón­ur á mánuði. Viðskiptaráð bendir á að munurinn milli launa menntaðra og ómenntaðra hér á landi sé minni en í nágrannalöndum.

„Nú er svo komið að einstaklingur getur einungis vænst 16% launahækkunar fyrir að ljúka bæði framhalds- og háskólaprófi, á meðan sambærileg launahækkun er 25-40% á öðrum Norðurlöndum. Gangi framangreindar breytingar í gegn verður þessi hækkun enn minni,“ segir í áliti Viðskiptaráðs.

Telja almenna skattalækkun heppilegri

Viðskiptaráði hugnast því illa hækkanir persónuafsláttar þó það styðji fækkun skattþrepa.  Mat ráðsins er „að mikil hækkun persónuafsláttar sé ekki heppileg leið til lausnar á núverandi deilum. Slík breyting myndi fjölga þeim sem greiða enga skatta og færa tekjuskattkerfið lengra í átt til aukinnar stigvaxandi skattbyrðar.“

Viðskiptaráð brýnir því fyrir stjórnvöldum og aðilum vinnumarkaðar að hagfelld skilyrði fyrir aukinni verðmætasköpun sé best til þess fallin að bæta kjör launþega. „Hluti af slíkum skilyrðum er að einstaklingar hafi hvata til að auka við þekkingu sína og skapa þannig aukin samfélagsleg verðmæti. Almenn lækkun tekjuskattshlutfalla og/eða fækkun skattþrepa væri heppilegri leið til að að ná slíku markmiði. Þannig mætti auka kaupmátt allra tekjuhópa og styrkja á sama tíma grundvöll bættra lífskjara til lengri tíma litið.“