Losun hafta ætti ekki að hafa áhrif á gengi krónunnar

Formaður ASÍ og framkvæmdastjóri Samtaka atvinnulífsins eru sammála um að hægt verði að framkvæma áætlun um losun gjaldeyrishafta án þess að það hafi áhrif á gengi krónunnar. Þá sé áætlunin til þess fallin að styrkja nýgerða kjarasamninga og viðhalda stöðugleika.

Léttir fyrir íslenskt atvinnulíf

Þorsteinn Víglundsson, framkvæmdastjóri Samtaka atvinnulífsins, segist mjög ánægður með áætlun stjórnvalda um losun gjaldeyrishafta. Um sé að ræða risastórt hagsmunamál fyrir íslenskt samfélag enda sé það nær óhugsandi fyrir fyrirtæki í alþjóðlegri starfsemi að staðsetja sig innan gjaldeyrishafta.

„Því fylgir gríðarlega mikið umfang og flækjustig,“ segir Þorsteinn. „Enda höfum við séð alltof mörg dæmi þess að fyrirtæki hafa valið að flytja starfsemi sína um set vegna gjaldeyrishaftanna. Og það er mikill léttir fyrir íslenskt atvinnulíf að það hylli nú undir lok þessa tímabils.“

Hann segir að áætlunin muni hafa jákvæð áhrif á nýgerða kjarasamninga, og þá sem eftir standa. Þá sérstaklega þar sem áhyggjur af áhrifum losunar hafta á gengi krónunnar geti verið talsvert minni en áður.

„Og ætti þar af leiðandi að létta undir með kjaraviðræðum, og ekki síður að styrkja þá tiltrú manna að það verði hér kaupmáttaraukning á komandi misserum,“ segir Þorsteinn.

Treysti forsendur til þess að ná stöðugleika

Gylfi Arnbjörnsson, forseti Alþýðusambands Íslands, tekur undir þetta. Hann segir að það eigi að vera hægt að losa um höftin án þess að það hafi áhrif á gengi krónunnar.

„Ég held að þetta treysti forsendur þess að ná hér stöðugleika,“ segir Gylfi. „Vegna þess að það er alveg ljóst að það er forsenda þess, til dæmis í kjarasamningum, að ef gengið brestur, þá losni um kjarasamninga. Og útfærslan á þessu ætti að þýða það að til þess komi ekki.“