Jón Ólafsson: Þarf sterkt réttarkerfi til að geta keppt við Pepsi og Coca-Cola

Hæstiréttur snéri í gær við dómi Héraðsdóms Reykjavíkur og féllst á kröfu Icelandic Water Holdings hf. um að fyrirtækinu Iceland Glacier Wonders ehf. yrði gert að fella úr firmaheiti sínu vörumerki Icelandic Wather Holdings, ICELAND GLACIER. Vísir fjallaði um málið í gær.

Lovísa Jónsdóttir, hugverkalögfræðingur hjá Tego, hafði samband við Vísi í morgun. Minnti hún á að Icelandic Water Holdings hefði lagt aðaláherslu á kröfu um að Iceland Glacier Wonders fengi ekki að nota vörumerkið ICELAND GLACIER. Því liti fyrirtækið á niðurstöðu gærdagsins sem sigur.

Féllst Hæstiréttur þannig á að ruglingshætta væri milli firmaheitisins og skráðs vörumerkis Icelandic Water Holdings, ICELAND GLACIER, þar sem hætta væri á að tengsl væru með fyrirtækjunum. Var Iceland Glacier Wonders ehf. því bannað að nota auðkennið ICELAND GLACIER í firmaheiti sínu og gert að afmá það að viðlögðum dagsektum.



Iceland Water Holdings hf. hafði einnig áfrýjað dómi héraðsdóms þar sem fellt var úr gildi lögbann sýslumanns við notkun Iceland Glacier Wonders ehf. á auðkenninu ICELAND GLACIER, þ.m.t. á kynningarefni og vatnsflöskum. Taldi Hæstiréttur að ekki væri hætta á ruglingi milli auðkennisins ICELAND GLACIER og vara Iceland Glacier Wonders ehf. þar sem félagið notaði einnig annað vörumerki, SNO, með áberandi hætti. Var dómur héraðsdóms því staðfestur.

Málskostnaður á víxl

Iceland Water Holdings þarf að greiða 500 þúsund krónur vegna málskostnaðar í lögbannsmálinu en Icelandic Glacier Wonders 1200 þúsund krónur í hinu málinu.

Iceland Glacier Wonders ehf. þarf að breyta heiti sínu og þar af leiðandi umbúðum sínum þar sem nafnið kemur fram að sögn Jóns Ólafssonar.

„Við fögnum því að íslenskt réttarkerfi virðist í auknu mæli viðurkenna mikilvægi þess að vernda íslensk vörumerki, koma í veg fyrir misnotkun á hugverkaréttindum og styðja við ný fyrirtæki. Aðeins með sterkt réttarkerfi heima fyrir getum við byggt upp nægjanlega sterk fyrirtæki til að geta keppt við alþjóðleg fyrirtæki á borð við Nestle, Pepsi og Coca-Cola,“ segir Jón Ólafsson í fréttatilkynningu frá Iceland Water Holdings hf.

„Þessi dómur er því mikið fagnaðarefni enda hefur notkun samkeppnisaðila okkar á þessu firmaheiti skapað rugling þar sem vörur hans hafa ranglega verið tengdar við Iceland Water Holdings hf. Því mun vonandi linna nú. Ég er mjög ánægður með þessa niðurstöðu“.