Veritas kaupir Gengur vel

Veritas Capital ehf. hefur keypt allt hlutafé í fyrirtækinu Gengur vel ehf., sem stofnað var árið 2003 af Þuríði Ottesen. Í tilkynningu segir að markmið Gengur vel hafi verið frá upphafi að koma á markað fyrsta flokks heilsuvörum sem bæta heilsu fólks, bæta líðan og fyrirbyggja sjúkdóma.

Fyrirtækið selur mörg vörumerki á þessu sviði og má þar nefna NutriLenk, Natures Aid vítamín, Magnesium Sport, Pro Staminus, Raspberry Ketones, Pro gastro, Benecos snyrti- og húðvörur og fleira.

Veritas sérhæfir sig í rekstri fyrirtækja á sviði heilbrigðisþjónustu og er móðurfélag fyrirtækjanna Artasan, Distica, Medor og Vistor, sem sérhæfa sig í sölu, markaðssetningu og dreifingu á lyfjum, lækningatækjum, hjúkrunarvörum og fleiri heilbrigðistengdum vörum.

Fyrirhugað er að Gengur vel renni saman við Artasan þegar fram líða stundir. Framkvæmdastjóri Artasan er Brynjúlfur Guðmundsson.