Rekstraraðili Hörpuhótelsins opinberaður

Seinna í dag verður greint frá því hvaða erlenda hótelkeðja mun starfrækja hótel á Hörpureitnum.

Nýlega var greint frá því að bandaríska fasteignafélagið Carpenter & Company verði leiðandi fjárfestir í byggingu 250 herbergja, fimm stjörnu hótels framan við Hörpu og við hlið umdeildrar lóðar Landsbankans.

Markmið bandaríska fjárfestisins hefur frá upphafi verið að byggja hótel sem starfrækt yrði undir merkjum alþjóðlega viðurkenndrar hótelkeðju.

Í tilkynningu segir að nú hafi náðst samningar við leiðandi alþjóðlega hótelkeðju og verði greint frá því hver hún er á blaðamannafundi klukkan þrjú í dag.

Hótelið verði hið glæsilegasta og muni auk 250 herbergja geyma veislu- og fundarsali, fjölda veitingastaða og heilsulind. Gert sé ráð fyrir að framkvæmdir hefjist snemma á næsta ári og að hótelið verði opnað árið 2019.