Landsvirkjun endurfjármagnar 12 milljarða lán

Landsvirkjun skrifaði í gær undir sambankalán í íslenskum krónum til sjö ára að fjárhæð 12 milljarðar króna. Lánið er veltilán og getur fyrirtækið dregið á lánið og endurgreitt eftir þörfum.

Markmið lántökunnar er að Landsvirkjun hafi ávallt tryggan og greiðan aðgang að fjármögnun í íslenskum krónum. Í tilkynningu kemur farm að með lántökunni endurfjármagnar Landsvirkjun eldra sambankalán frá árinu 2011.

Íslandsbanki, ásamt Arion banka og Landsbankanum veita lánið sem samanstendur af jöfnum hlut frá bönkunum þremur, 4 milljarðar hver hlutur. Íslandsbanki sá um skjalagerð og umsýslu við lánveitinguna fyrir hönd Landsvirkjunar.