Reykjanes Geopark hlýtur alþjóðlega vottun

Reykjanes Geopark hefur fengið alþjóðlega vottun og aðild að samtökunum European Geoparks Network en um er að ræða samtök svæða sem þykja jarðfræðilega merkileg og njóta þau stuðnings UNESCO, Mennta-, menningar- og vísindastofnun Sameinuðu þjóðanna. Fram kemur í tilkynningu að Reykjanes Geopark sé eitt af stærstu verkefnum Heklunnar, atvinnuþróunarfélags Suðurnesja og hófst undirbúningur að vottun árið 2012 með ráðningu verkefnastjóra Eggert Sólbergs Jónssonar, en verkefnið er unnið í góðu samstarfi við hagsmunaaðila og sveitarfélögin fimm á Reykjanesi.

Aðild að samtökunum er mikil viðurkenning fyrir íbúa og atvinnurekendur á svæðinu og hún mun nýtast til markaðssetningar, fræðslu og uppbyggingar á Reykjanesi. Að sögn Berglindar Kristinsdóttur framkvæmdastjóra Heklunnar er það afar ánægjulegt að sjá verkefnið vera í höfn.

Aðilar að Reykjanes Geopark eru Heklan, atvinnuþróunarfélag Suðurnesja, sveitarfélög á Reykjanesi, Ferðamálasamtök Reykjaness, Bláa Lónið, Þekkingarsetur Suðurnesja, Keilir - miðstöð vísinda fræða og atvinnulífs og HS Orka.