Bjórsetur opnar úti á Granda

Opnað hefur verið bjórsetur á Granda, nánar tiltekið á Eyjaslóð. Staðurinn nefnist Ægisgarður og rúmar um 200 manns og eru fimm barir inni á staðnum, hver með sínu þema. Heildarfjárfesting í staðnum er yfir 100 milljónir króna og er ætlunin að draga að ferðamenn og aðra hópa til að njóta skemmtidagskrár sem tengist íslenskum bjór og bjórmenningu.

Staðurinn er ekki hugsaður sem hefðbundinn skemmtistaðurinn en hann er eingöngu ætlaður hópum, frá 15 upp í 200 manns. Hægt verður að fræðast um íslenska bjóra og bjórmenningu, haldin verða svokölluð pöbb-kviss og hægt verður að taka þátt í bragðprófunum á ólíkum bjórtegundum. Gestgjafi Ægisgarðs er Ólafur S.K. Þorvaldz leikari en hann mun stýra skemmtidagskrá fyrir hópa sem munu sækja staðinn.

Í tilkynningu segir að boðið verður upp á sérstaka dagskrá í Ægisgarði fyrir erlenda ferðahópa, en bæði Víking og Einstök bjórarnir, hafa náð fótfestu á erlendum mörkuðum á síðustu árum sem aukið hefur forvitni ferðamanna um íslenskan bjór. Þótt íslensk bjórhefð sé ung að árum er áhugi ferðamanna á hefðinni og íslenskum bjór mjög mikill og fer vaxandi. Sárlega hefur vantað fleira fyrir erlenda ferðamenn að gera innan borgarmarkanna og bjórsetur sem þessi eru vinsælir áfangastaðir ferðamanna í borgum t.d. á Norðurlöndunum.