Seðlabankinn greiðir upp lán frá AGS

Seðlabanki Íslands hefur greitt fyrirfram eftirstöðvar láns frá Alþjóðagjaldeyrissjóðnum sem tekið var í tengslum við bankahrunið í október 2008. Með uppgreiðslunni lækka erlendar skuldir íslenska þjóðarbúsins.

Í tilkynningu frá Seðlabankanum segir að eftirstöðvar lánsins sem greiddar voru upp hafi numið um 42 milljörðum króna. Heildarupphæð lánsins nam um 250 milljörðum króna. Að mati Seðlabankans hefur svigrúm myndast í lausafjárstöðu bankans til þess að minnka skammtímaskuldir í erlendum gjaldeyri, m.a. vegna viðskipta bankans á innlendum gjaldeyrismarkaði og því hafi lánið verið greitt upp á þessum tímapunkti.

Með uppgreiðslunni lýkur eftirfylgni Alþjóðagjaldeyrissjóðsins hér á landi í kjölfar loka efnahagsáætlunar Alþjóðagjaldeyrissjóðsins og íslenskra stjórnvalda.