Unnur Mjöll nýr framkvæmdastjóri Samtaka Vefiðnaðarins

Unnur Mjöll S. Leifsdóttir hefur verið ráðin sem framkvæmdastjóri Samtaka Vefiðnaðarins (SVEF).

Frá stofnun samtakana hefur skipulag verið alfarið í höndum grasrótinnar, stjórnar og félagsmanna og má segja að nú sé nýr kafli framundan í sögu SVEF þar sem fyrsti starfsmaðurinn hefur verið ráðinn. Stjórn SVEF sér gríðarleg tækifæri í eflingu vefiðnaðarins og bindur miklar vonir við að Unnur Mjöll leiði þá vinnu af miklum dug.

Unnur hefur áður starfað sem safnfulltrúi og staðgengill forstöðumanns til skemmri tíma hjá Hafnarborg, lista og menningarsetri Hafnarfjarðar og hjá Listasafni Reykjavíkur þar sem hún sá meðal annars um framkvæmd ýmissa viðburða og sýninga. Auk þess hefur hún starfað sem myndlistarmaður og hefur sýnt verk sín víða m.a. í New York og Seoul og í S. Kóreu. Unnur Mjöll er með MFA frá School of Visual Arts í New York og MA í Menningarstjórnun frá Háskólanum á Bifröst. Hún er einnig með BA gráðu í myndlist frá Listaháskóla Íslands.

Samtök vefiðnaðarins (SVEF) eru fagsamtök þeirra er starfa að vefmálum á Íslandi. Samtökin hafa það að markmiði að miðla þekkingu og efla fagleg vinnubrögð í greininni, vera samræðuvettvangur félagsmanna og andlit stéttarinnar út á við. SVEF sér árlega um framkvæmd Íslensku vefverðlaunanna og stendur fyrir ráðstefnunni IceWeb, sem er metnaðarfull alþjóðleg ráðstefna um vefmál, auk fjölda smærri fyrirlestra, umræðufunda.

Félagsmenn SVEF eru um 300 talsins en og koma úr ýmsum sviðum vefheima en meðal félagsmanna má m.a. finna vefara, forritara, hönnuði, vefstjóra, prófara, markaðsstjóra, framkvæmdastjóra, kennara o.s.frv.

SVEF mun standa fyrir morgunverðarfundi þann 17. nóvember í Listasafni Reykjavíkur Hafnarhúsi, undir yfirskriftinni Hvað kostar vefur í dag? Þar verður velt upp ýmsum hliðum á þeim teningi, Sigurjón Ólafsson hjá Fúnksjón og Jón Cleon hjá Landsvirkjun verða með sitt hvort erindið á þeim fundi.