Viðskiptaráð hvetur til lækkunar launatengdra skatta

Til að starfsmaður geti fengið 340 þúsund krónur útborgaðar í grunnlaun þarf vinnuveitandi að leggja út sem nemur 740 þúsund krónum á mánuði. Bilið milli kostnaðar vinnuveitanda og grunnlauna starfsmanns eftir skatt nemur því 400 þúsund krónum. Samkvæmt nýju infógrafík frá Viðskiptaráði.

Fyrir starfsmenn skipta útborguð mánaðarlaun mestu máli. Vinnuveitendur horfa hins vegar á heildarkostnað vegna launa og launatengdra gjalda. Á milli þessara tveggja stærða er breitt bil. Auk beinna launa greiða vinnuveitendur tryggingagjald og mótframlag til lífeyris. Því til viðbótar njóta starfsmenn orlofsréttinda og annarra fríðinda sem ekki koma fram á launaseðli. Til að geta greitt starfsmanni 500 þúsund krónur í grunnlaun þarf því að leggja út sem nemur 740 þúsund krónum á mánuði. Eftir lögboðnar skatt- og lífeyrisgreiðslur nema grunnlaunin um 340 þúsund krónum. Bilið á milli kostnaðar vinnuveitanda og grunnlauna starfsmanns eftir skatt nemur því 400 þúsund krónum. Undir slíkum kringumstæðum er hætt við að upplifun þessara tveggja aðila á launakjörum sé ólík.

Í ljósi þess hvetur VÍ til að dregið verði úr þessum mismun með lækkun launatengdra skatta (tryggingagjalds, tekjuskatts og útsvars) samhliða afnámi samningsbundinna eingreiðslna.