Fiskafli í október rúm 72 þúsund tonn

Heildarafli íslenskra fiskiskipa var rúm 72 þúsund tonn í október og dróst saman um 25,6% samanborið við október 2014. Aflinn metinn á föstu verði var hins vegar ekki nema 10,8% minni en í október 2014 og liggur skýringin í miklum samdrætti á uppsjávarafla á meðan botnfiskaflinn var svipaður á milli ára. Þetta kemur fram í frétt á vefsíðu Hagstofu Íslands.

Samdráttur í uppsjávarafla skýrist af mun minni síldarafla en alls veiddust tæp 22.400 tonn af síld í október samanborið við rúm 49.700 tonn í október 2014. Afli uppsjávartegunda nam í heild tæpum 27.800 tonnum í október samanborið við 52.900 tonn í október 2014. Botnfiskaflinn í október nam rúmum 41.100 tonnum og stóð svo að segja í stað miðað við október 2014. Flatfiskaflinn nam tæpum 2.500 tonnum samanborið við 1.750 tonn í október 2014. Afli skel- og krabbadýra dróst lítillega saman, nam 742 tonnum samanborið við 893 tonn í október í fyrra.

Á síðustu 12 mánuðum nam heildarafli um 1.310 þúsund tonnum sem er aukning um 21,6% miðað við sama tímabil ári fyrr. Aukningin í aflamagni skýrist að mestu af stórauknum loðnuafla.