Telja greiningu InDefence byggða á misskilningi

Greining InDefence hópsins á greiðslujafnaðarvanda landsins byggist líklega á grundvallarmisskilningi á eðli hans. Þetta er meðal þess sem kemur fram í svari Seðlabankans við umsögn InDefence um mat bankans á undanþágubeiðnum slitabúa.

Seðlabankinn telur að hugmyndir meðlima hópsins, þess efnis að nánast allar skuldir sem þurfi að endurfjármagna á gjalddaga feli í sér yfirvofandi gjaldeyrisútstreymi, eigi ekki við rök að styðjast. Eins og greint var frá í greinargerð Seðlabankans frá 27. október 2015 felst greiðslujafnaðarvandinn sem stafar af slitabúum fallinna fjármálafyrirtækja, komi ekki til mótvægisaðgerða, í fjármagnshreyfingum sem myndu eiga sér stað þurfi búin að skipta andvirði innlendra eigna yfir í gjaldeyri til þess að greiða erlendum kröfuhöfum við slitin.

Að mati bankans er það algert lykilatriðið að eftir slitaferlið munu skuldahlutföll þjóðarbúsins vera hagstæðari en þau hafa verið um áratuga skeið. Skiptir þá engu hvort sé litið til vergra eða hreinna skulda. Einnig er það mat bankanst að staða einstakra aðila að baki skuldunum sé slík að ekki sé líklegt að til endurfjármögnunar komi á næstu árum.

Að lokum bendir Seðlabankinn á að ekki er miðað að því að uppgjör föllnu bankanna fjármagni aðra liði stöðugleikaáætlunar ríkisins. Það virðist vera skoðun hópsins að nota eigi slitin til að ganga lengra en að tryggja stöðugleika en deila megi um lagalegan grundvöll þess.

Svar Seðlabankans má lesa í heild sinni hér.