Besta afkoma Ölgerðarinnar frá upphafi

Rekstrarhagnaður Ölgerðarinnar Egils Skallagrímssonar fyrir fjármagnskostnað er 59% meiri árið 2014 en árið áður, samkvæmt nýbirtum ársreikningi. Þannig var EBIT fyrirtækisins 1.178 milljónir króna árið 2014 en var 741 milljón árið áður. EBITDA var 1.642 milljónir króna en var 1.204 milljónir árið 2013. Velta fyrirtækisins á rekstrarárinu sem lauk 28.02. 2015 var 19,6 milljarðar króna og jókst um 6,5% milli ára, segir í tilkynningu.

Launagreiðslur til starfsmanna námu 2,5 milljörðum króna en alls störfuðu 334 starfsmenn hjá fyrirtækinu og fjölgaði störfum um 14. Hagnaður fyrirtækisins fyrir tekjuskatt reyndist 600 milljónir króna. Tekjuskattur var tæpar 400 milljónir króna en hann var að mestu tilkominn vegna ákvörðunar RSK um öfuga samruna.

Heildareignir Ölgerðarinnar voru 13 milljarðar króna og vaxtaberandi langtímaskuldir voru 7,4 milljarðar. Rekstur Ölgerðarinnar skilaði hreinu veltufé að upphæð tæplega 1,6 milljarðar og skattspor á árinu 2014 var 8,4 milljarðar, eða 43% af veltu.

„Þetta er besta afkoma Ölgerðarinnar frá upphafi og við erum afskaplega stolt af þessum frábæra árangri. Hér hafa allir lagst á eitt til að skapa framúrskarandi vinnuumhverfi og að sinna viðskiptavinum okkar sem hafa kunnað að meta vörur okkar betur en nokkru sinni," segir Andri Þór Gumðundsson, forstjóri, í tilkynningu.