Grænt ljós á Porsche rafmagnsbíl

Porsche hefur ýjað að smíði rafmagnsbíl síðustu misserin og nú berast þær fréttir úr herbúðum þeirra að tekin hafi verið ákvörðun um smíði slíks bíls. Porsche sýndi gestum á bílasýningunni í Frankfürt fyrr á þessu ári tilraunabílinn Mission E concept og verður rafmagnsbíllinn byggður á þeim hugmyndabíl.

Porsche ætlar að byggja nýja verksmiðju þar sem þessi rafmagnsbíll verður smíðaður og fyrirtækið hyggst ráða 1.000 nýja starfsmenn til verksins. Verksmiðjan verður í höfuðstöðvum Porsche í Zuffenhausen í nágrenni Stuttgart. Ennfremur verður vélaverkmiðjunni í Zuffenhausen stækkuð svo þar megi smíða rafmótora.

Mission E hugmyndabíllinn er á stærð við Porsche Panamera og er ekki búist við því að rafmagnsbíllinn verði mikið breyttur frá grunngerð hugmyndabílsins. Aflið verður nægt í þessum rafmagnsbíl eins og búast má við af Porsche bíl. Hann verður 600 hestöfl og er aðeins 3,5 sekúndur að ná 100 km hraða og 12 sekúndur að ná 200 km hraða.

Rafhlöður bílsins má hlaða að 80% leiti á aðeins 15 mínútum og þá má aka honum 400 km, en fullhlaðinn kemst hann 500 km. Bíllinn verður fjórhjóladrifinn og fjórhjólastýrður að auki.