Vægast sagt sérstök stemning á Miss Universe: Hryðjuverkaógn í bland við fegurðardrottningablús

„Ég var svo þrotuð, og hugsaði bara að ef eitthvað kæmi fyrir mig væri það líklegast eitthvað sem ætti að gerast. Ég varð mér úti um kósí föt og hreiðraði um mig með nammi uppi á hóteli, þar sem öllu var lokað og algjörlega bannað að fara út,“ segir Manuela Ósk Harðardóttir, fyrrverandi ungfrú Ísland, sem nú dvelur í Las Vegas.

Má með sanni segja að Manuela hafi haldið úti stórbrotinni spennusögu á Snapchat-reikningi sínum, sem er þéttsetinn aðdáendum, þegar hún upplifði eitt vandræðalegasta augnablik í sögu Miss Universe-keppninnar skömmu áður en hún var lokuð inni á hóteli vegna möguleika á hryðjuverkaárás á Planet Hollywood í Las Vegas, þar sem hún var stödd.

Sinnti Manuela hlutverki dómara í tískupallagöngu keppenda, og var því í salnum á sunnudagskvöldið. Ekki er ofsögum sagt að Vegas-ferðin hennar hafi verið skrautleg, en líkt og flestir hafa orðið varir við var röng fegurðardrottning krýnd, þegar grínistinn Steve Harvey tilkynnti fyrir fullum sal að ungfrú Kólumbía hefði hreppt hnossið, þegar ungfrú Filippseyjar hafði raunverulega verið valin.

 „Þetta var rosalegt, ég var sjálf í mjög góðu sæti, mitt á milli filippseyska fylgiliðsins og þess kólumbíska. Fólk greip bara um andlitið þegar Steve steig á sviðið aftur og sagðist hafa gert mistök. Það varð dauðaþögn og fólk var bara í sjokki,“ segir Manuela, sem segir Íslendinga líklega ekki átta sig á umfangi keppninnar, og þeirra mistaka sem áttu sér stað.

„Fylgjendur filippseysku stelpunnar tóku þátttöku hennar mjög alvarlega, og í hvert einasta skipti sem hún kom á sviðið bilaðist hópurinn. Þarna voru fullorðnir karlar í sparifötum og með kórónur, þetta var ótrúleg upplifun.“

Manuela segir þó að ekki hafi komið til handalögmála þegar í ljós kom að röng stúlka bæri kórónuna. „Fólk var bara rosalega vonsvikið, ég meina, hversu flókið er að segja rétt nafn? Hvernig er hægt að klúðra þessu?“ spyr hún, og bætir við að sjálf hafi hún ákveðnar hugmyndir um að þetta hafi verið fyrirfram ákveðið atriði, og fleiri séu á því máli.

 „Það fóru strax sterkar sögusagnir á flug um það, og fólk sem þekkir þennan keppnisbransa eins og lófann á sér sagði að það hefði verið svolítið skrítið að ekki hefði verið klippt á útsendinguna eins og er alltaf gert þegar búið er að afhjúpa sigurvegarann. Núna voru myndavélarnar hins vegar enn á sviðinu, og allt í þögn. Ég veit að áhorf á keppnina hefur fallið, svo það ýtir enn frekar stoðum undir þessa samsæriskenningu,“ segir Manuela, og bætir við að ef satt reynist, sé það hryllilega illa gert gagnvart þeirri kólumbísku.

„Stemningin varð líka svolítið eins og enginn hefði unnið, sú filipps­eyska gat eiginlega ekkert glaðst í þessum aðstæðum, hin grátandi og allt frekar skrítið.“ En ekki tók betra við eftir að keppni lauk, því þá fékk Manuela þær fréttir að talið væri að hugsanlega hefði verið gerð hryðjuverkaárás í móttöku hótelsins, þar sem hún var einmitt stödd.

„Þetta var mjög dramatískt, þetta er auðvitað rosalega stór keppni og ég fæ bara þær upplýsingar að möguleg hryðjuverkaárás hafi átt sér stað á Planet Hollywood, þar sem ég var. Ég var svolítið lengi að koma mér af stað út, svo ef ég hefði farið fyrr, hefði ég vel geta lent í þessu, þar sem fólk sem kom af keppninni var þarna á meðal,“ útskýrir hún og hneykslast á hve dramatískir Bandaríkjamenn geti verið, en hún var eins og áður segir lokuð inni á hótelinu þar til búið var að blása hryðjuverkaógnina af.

 „Ætli ég sé ekki dálítið góð í að koma mér í alls konar ævintýri,fólk getur svo bara stokkið á vagninn á Snap­chat, manuelaosk,“ segir Manuela að lokum, og hlær, blessunarlega heil á húfi á leið sinni til Los Angeles þar sem hún ætlar sér að eyða jólunum með fjölskyldunni.