Hótel Holt 50 ára

Eitt þekktasta hótel landsins fyllir fimmtíu árin á morgun. Hótel Holt var opnað þann 12. febrúar 1965. „Við ætlum að taka á móti okkar bestu viðskiptavinum og halda teiti fyrir þá og starfsfólkið okkar og fagna þannig,“ segir Sigrún Þorgeirsdóttir hótelstjóri í samtali við Markaðinn, spurð að því hvernig aðstandendur hótelsins muni gera sér dagamun.

„En svo er undirbúningurinn búinn að standa yfir allt árið af því að við höfum verið að leggja áherslu á að endurbæta. Við erum búin að vera að skipta út öllum pípulögnum og teppum og fleiru,“ bætir hún við.

Sigrún er búin að stýra hótelinu í eitt ár, en eigandi þess er Geirlaug Þorvaldsdóttir. Það var Þorvaldur Guðmundsson, faðir hennar, og Ingibjörg Guðmundsdóttir, móðir hennar, sem hófu rekstur hótelsins. Þau Þorvaldur og Ingibjörg voru miklir listunnendur og allt hótelið ber vitni um það með málverkum og öðrum listaverkum.

Framboð á hótelrými hefur aukist nokkuð að undanförnu en Sigrún segir að hótelið standist fyllilega samkeppni við nýrri hótel. „Á Trip Advisor erum við á meðal fjögurra bestu hótela í Reykjavík,“ segir Sigrún, en hin hótelin eru Hilton, Marína og Þingholt.

Veitingahúsið á Hótel Holti, Gallery Restaurant, er rekið af þeim Friðgeiri Inga Eiríkssyni yfirmatreiðslumanni, Eiríki Inga Friðgeirssyni og fjölskyldum þeirra.