Velta á íslenskum markaði er um 1.700 milljónir á dag

Velta á íslenskum hlutabréfamarkaði hefur sautjánfaldast frá árinu 2010 þegar hún var hvað lægst. Dagleg velta það sem af er febrúar nemur um 1.700 milljónum króna.

Páll Harðarson, forstjóri Kauphallar Íslands, segir að það hafi gríðarlega mikla þýðingu að fá ný félög skráð í Kauphöllina.

„Það hefur gríðarlega þýðingu að fá ný félög inn. Við sjáum að þetta gerist ekki línulega. Árið 2010 var meðalvelta á dag, þegar við náðum botninum, 100 milljónir á hlutabréfamarkaði. Svo skreið hún í 300 milljónir 2012 og var komin í ríflega milljarð í fyrra. Það sem af er febrúar núna er hún komin í um 1.700 milljónir.“ Eigendur Advania stefna að því að skrá félagið á markað við sex mánaða uppgjör, sem yrði í október, samkvæmt heimildum Fréttablaðsins. Það er mun fyrr en áætlanir gerðu ráð fyrir. Þegar sænska félagið AdvInvest, sem á 58 prósent í fyrirtækinu á móti Framtakssjóði Íslands, keypti sinn hlut í haust var stefnt á skráningu eftir tvö til fimm ár.

Fréttablaðið hefur heimildir fyrir því að sænska félagið þrýsti mjög á um að skráning verði eins fljótt og kostur er og hafi rætt við Framtakssjóð um skráningu á sex mánaða uppgjörinu. Um tvískráningu verður að ræða; í Reykjavík og Stokkhólmi. „Eins og fram kom þegar norrænu fjárfestarnir komu að, þá er það markmið, bæði þeirra og Framtakssjóðsins, að félagið endi sem skráð félag og helst þá tvískráð, hér heima og í Kauphöllinni í Stokkhólmi,“ segir Gestur G. Gestsson, forstjóri Advania. „Tímasetningin nákvæmlega á því hefur ekki verið sett, en við getum sagt að það hafi verið mörg góð skref stigin í þá átt í uppsetningu á rekstri félagsins sem gerir okkur kleift að fara að hugleiða það.“

Alls eru 14 félög skráð í Kauphöll Íslands. Á meðal félaga sem vinna að skráningu á markað má nefna Eik, Reiti og Símann. Þá hafa félög eins og Fáfnir Offshore verið nefnd til sögunnar. Félög þurfa að vera af ákveðinni stærð til að flot bréfanna verði nægilegt svo hægt sé að skrá þau í Kauphöllina. Á mannamáli þýðir það að nægilegt magn þeirra verður að ganga kaupum og sölum.

„Þessi félög sem hafa komið inn hafa gjörbreytt markaðnum. Augu miklu fleiri fjárfesta beinast að markaðnum, hann verður miklu áhugaverðari sem þýðir það einfaldlega að þau fyrirtæki sem koma inn geta vænst miklu betri markaðar til að vinna á, upp á fjármögnun og áhuga fjárfesta,“ segir Páll Harðarson.

Fjórtan félög skráð í Kauphöllinni

Alls eru 14 félög skráð í Kauphöll Íslands. Á meðal félaga sem vinna að skráningu á markað má nefna Eik, Reiti og Símann. Þá hafa félög eins og Fáfnir Offshore verið nefnd til sögunnar. Félög þurfa að vera af ákveðinni stærð til að flot bréfanna verði nægilegt svo hægt sé að skrá þau í Kauphöllina. Á mannamáli þýðir það að nægilegt magn þeirra verður að ganga kaupum og sölum.

„Þessi félög sem hafa komið inn hafa gjörbreytt markaðnum. Augu miklu fleiri fjárfesta beinast að markaðnum, hann verður miklu áhugaverðari sem þýðir það einfaldlega að þau fyrirtæki sem koma inn geta vænst miklu betri markaðar til að vinna á, upp á fjármögnun og áhuga fjárfesta,“ segir Páll Harðarson.