Hluthafar fimmfalt fleiri fyrir hrun

Hluthöfum í félögum sem skráð eru í Kauphöll Íslands hefur fækkað úr 7.000 að meðaltali í árslok 2007 í 1.400 í árslok 2014. Þá voru sex fyrirtæki með á milli 20 og 30 þúsund hluthafa í árslok 2007 en hluthafar í því félagi í Kauphöllinni, sem nú er með flesta hluthafa, eru þrjú þúsund.

Þetta kom fram í máli Magnus Billing, forstjóra Kauphallarinnar í Svíþjóð, á fundi um góða stjórnunarhætti í Háskóla Íslands í gær.

Magnus segir að til þess að almenningur fjárfesti á ný í hlutabréfum á Íslandi þurfi stofnanaumhverfi að vera sterkt og traust til staðar.

Ein leið til að efla traust sé að fyrirtæki fylgi þeim reglum sem settar hafa verið um góða stjórnarhætti af Viðskiptaráði, SA og Kauphöllinni.

Einungis þrjú fyrirtæki sem eru skráð í Kauphöllina hafa hlotið vottun á því sviði. Páll Harðarson, forstjóri Kauphallarinnar á Íslandi, segir að hann vilji gjarnan að fleiri fyrirtæki taki upp vottunina.

„Þetta stuðlar að auknu gegnsæi í stjórnun fyrirtækja og sýnir að þessir stærri og áhrifameiri fjárfestar láta sig þetta varða. Þetta er traustleikamerki fyrir aðra fjárfesta,“ segir Páll.