Handbært fé er um helmingur af eignum slitabús: Eignir upp í kröfur 800 milljarðar króna

Bókfært virði eigna Kaupþings nam 799,8 milljörðum króna í árslok 2014. Handbært fé er rúmlega helmingur af því. Útstandandi kröfur nema hins vegar 2.825,6 milljörðum króna. Eignir nema því rétt rúmlega 28 prósentum af kröfum. Kröfuhafafundur var haldinn í fyrradag þar sem niðurstaðan var kynnt.

Vísir greindi frá því á dögunum að eignir slitabús Glitnis banka nema tæplega 963 milljörðum íslenskra króna en kröfurnar nema 2.271 milljarði króna. Búið á því um það bil 42 prósent upp í kröfur.

Í tilkynningu frá Kaupþingi kemur fram að eignir Kaupþings jukust um 21,7 milljarða á liðnu ári eða um 2,8 prósent. Því til viðbótar voru í árslok, 19,2 milljarðar króna geymdir á vörslureikningi til að mæta umdeildum seint framkomnum forgangskröfum.

Heildarfjárhæð útistandandi krafna í kröfuskrá lækkaði um 53,7 milljarða á árinu og nam 2.825,6 milljörðum króna í árslok. Ástæður þessarar lækkunar má að mestu leyti rekja til úrlausna ágreiningsmála.