Digon kynnir tekjulíkan sitt á ráðstefnu í Vegas

Stjórnendur íslenska tölvuleikjafyrirtækisins Digon Games munu kynna fyrirtækið og tölvuleik þess á Collision Conference í Las Vegas í byrjun maí.

Það er tækniráðstefna á vegum sömu aðila og skipuleggja Web Summit í Írlandi, eina helstu tækniráðstefnu Evrópu. Fyrsti leikur Digon Games er knattspyrnustjóraleikur sem allir notendur spila samtímis og hafa því áhrif á framgang hver annars í leiknum.

„Við erum aðallega að fara til að hitta markaðsfólk og selja því hugmyndina um vörumerkjabirtingar innan leikjaheimsins okkar. Við lítum til stærri auglýsenda sem hafa áður tengt sín vörumerki við íþróttir og íþróttaviðburði. Má þar nefna framleiðendur á sviði íþróttavarnings, gosdrykkja, bíla og svo mætti áfram telja,“ segir Jón Fjörnir Thoroddsen, framkvæmdastjóri Digon, um helstu ástæður þess að fyrirtækið verður á ráðstefnunni. Hann segir þetta eitt af fyrstu skrefum Digon Games til að markaðssetja tekjulíkan fyrirtækisins og leikinn sjálfan á alþjóðavísu. Tekjumódel Digon Games hefur þegar hlotið stuðning Tækniþróunarsjóðs hér á landi en félagið fékk verkefnastyrk til tveggja ára í fyrravor.

Jón bendir á að Web Summit á Írlandi hafi verið haldin í lok síðasta árs. Fjórum mánuðum eftir að henni lauk höfðu fimmtán nýsköpunarfyrirtæki sem kynntu sig á ráðstefnunni fengið fjármögnun fyrir alls 276 milljónir evra eða um 40 milljarða íslenskra króna.

Jón segir vinnu við leikinn á lokastigum en prófanir hafa farið fram á þessu ári. Gert er ráð fyrir að Ísland verði notað sem tilraunamarkaður í sumar áður en leikurinn verður markaðssettur á heimsvísu. „Það er gott að eiga aðgang að litlum og lokuðum markaði eins og Íslandi. Það gefur okkur ákveðið tækifæri til að fá smá reynslu á það sem við erum að gera áður en farið er að synda á meðal stóru fiskanna í leikjaheiminum,“ segir hann.