Kauphallardagar fara fram í fimmta skipti

Kauphallardagar Arion banka hefjast í dag. Þar fá stjórnendur félaga í Kauphöll Íslands og félaga, sem hafa lýst áhuga á skráningu í náinni framtíð, tækifæri til að kynna félögin fyrir fjárfestum og öðrum þeim sem fylgjast með hlutabréfamarkaðinum. Hver stjórnandi heldur stutta framsögu og í framhaldinu er gefinn kostur á spurningum úr sal.

Þetta er fimmta árið í röð sem Arion banki stendur fyrir Kauphallardögum og í ár munu 15 fyrirtæki taka þátt, en skipulagning hefur verið í höndum greiningardeildar bankans. Stefán Broddi Guðjónsson hjá Greiningardeild Arion segir að í fyrstu hafi hugmyndin verið að styðja við endurreisn hlutabréfaviðskipta í Kauphöll Íslands og auka umfjöllun um skráðu félögin. Þegar Kauphallardagarnir voru fyrst haldnir mátti telja þau fyrirtæki sem þátt tóku á fingrum annarrar handar. „Síðan hefur Kauphallardögum vaxið fiskur um hrygg og félögum fjölgað og umfjöllun um markaðinn orðin meiri,“ segir Stefán Broddi. Félögum í Kauphöllinni fjölgar um eitt á meðan á dögunum stendur, því áætlað er að 9. apríl hefjist viðskipti með hlutabréf fasteignafélagsins Reita.

Stefán Broddi segir að Arion sé ekki að finna upp hjólið með Kauphallardögunum þótt verið sé að byggja upp hefð fyrir slíku fyrirkomulagi á Íslandi. „Þannig standa fjárfestingabankar um heim allan fyrir dögum sem þessum þar sem sérstök áhersla er lögð á ákveðna atvinnugrein, landsvæði eða ákveðið þema. Hjá okkur er fókusinn á skráð félög í Kauphöll Íslands eða íslensk félög sem hyggja á skráningu á hlutabréfamarkað. Þannig taka fjórtán íslensk fyrirtæki þátt og svo Bank Nordik frá Færeyjum en bankinn er jú bæði skráður í Reykjavík og Kaupmannahöfn,“ segir hann.

Stefán Broddi segir að greiningadeildin telji að frá sjónarhóli fjárfesta sé þetta afar gott tækifæri til þess að hlýða á snarpar kynningar frá stjórnendum fyrirtækjanna og taka þátt í umræðum.