Hittir Þróttara tvisvar sinnum í viku í fótbolta

Guðjón Auðunsson, forstjóri Reita, hefur staðið í ströngu undanfarið við að undirbúa skráningu fyrirtækisins í Kauphöll Íslands. Viðskipti með bréfin hófust svo á fimmtudag í síðustu viku.

Guðjón hefur langa starfsreynslu að baki. Hann hefur verið forstjóri Reita í tæp fimm ár. Áður var hann í níu ár hjá Essó, sem síðar rann inn í N1, og þar áður hjá Eimskipi í níu ár.

„Ég tók mastersgráðu í alþjóðaviðskiptum og markaðssetningu frá Háskólanum í Álaborg í Danmörku. Þegar ég kom til Íslands var ég lektor í tvö ár á Bifröst eftir að honum hafði verið breytt í háskóla og kenndi þar,“ segir Guðjón. Hann segir að það hafi verið mikil reynsla að taka á móti námsefni í fimm ár og verja síðan tveimur árum á eftir í að miðla því til annarra.

Guðjón sinnti fjölbreytilegum verkefnum hjá Eimskipi, eftir að hann byrjaði þar árið 1991. „Ég var yfir markaðsdeild og var framkvæmdastjóri Eimskips í Bandaríkjunum og svo í Hamborg í Þýskalandi í tvö ár,“ segir hann. Hann segist ekki geta svarað því til hvaða vinnustaður sé skemmtilegastur, Eimskip, Esso eða Reitir.

„Þetta er eins og að gera upp á milli barnanna sinna. Þú færð mig ekki til að svara þessu,“ segir Guðjón og hlær. Hann tekur fram að það sé ótrúlega samheldinn hópur sem hann hafi hitt á báðum þeim fyrri vinnustöðum sem hann var á, Esso og Eimskip, og hann hitti fyrrverandi samstarfsmenn sína þaðan reglulega.

Guðjón segist hafa unnið að skráningu Reita eiginlega allt frá því að hann byrjaði sem forstjóri. „Félagið var að langstærstu leyti í eigu viðskiptabankanna þriggja. Þeir gátu ekki átt þetta félag til framtíðar og um það var gert samkomulag við Samkeppniseftirlitið að þeir þyrftu að koma þessu félagi af sínum höndum innan tiltekins tíma,“ segir Guðjón. Verkefni hans á undanförnum árum hafi því verið daglegur rekstur fyrirtækisins, endurfjármögnun þess og undirbúningur fyrir skráningu á markað.

Guðjón ver frítíma sínum að mestu leyti í hreyfingu. „Mér finnst útivera skemmtileg. Á sumrin er það golfið. Ég er dottinn í það að klífa fjöll og er að byrja að láta plata mig í það að vera á hjóli,“ segir Guðjón. Á veturna er hann aðallega í því að spila fótbolta.

„Frambyggðir Þróttarar hittast tvisvar í viku og spila fótbolta saman og svo læt ég plata mig í spinning reglulega,“ segir Guðjón. Hann reyni því að hjóla inni á veturna en úti á sumrin.