Bíður spenntur eftir fyrstu kóræfingunni

Önundur Páll Ragnarsson var á dögunum ráðinn á fjármálastöðugleikasvið Seðlabanka Íslands og hefur störf um miðjan ágúst. Hann mun ganga til liðs við teymi hjá bankanum sem vinnur að mótun þjóðhagsvarúðarstefnu.

„Þetta snýst í aðalatriðum um það að innleiða og framfylgja mælikvörðum, eða vísum, sem segja til um það hvort kerfislæg áhætta sé að myndast í bankakerfinu og hvort kerfið geti staðið af sér högg eða skelli sem hagkerfið í heild kann að verða fyrir,“ segir Önundur í samtali við Markaðinn. Þessir þjóðhagsvísar eigi þá að vera til þess fallnir að hægt sé að sjá kerfislæga áhættuþætti myndast tímanlega, svo að hægt sé að grípa inn í ef þurfa þykir. Þannig geti þessir vísar auðveldað og rökstutt ákvarðanir um inngrip eða reglusetningu sem yfirmenn bankans telja nauðsynlega.

Önundur útskrifaðist nýlega úr námi á Spáni með M.S.-gráðu í þjóðhagfræðilegri stefnumótun og fjármálamörkuðum. „Barcelona GSE er bara fyrir meistaranám í hagfræði og er samstarfsverkefni tveggja góðra háskóla og tveggja rannsóknarstofnana á sviði hagfræði,“ útskýrir Önundur. Hann sótti skólann rétt utan við Barcelona, en naut leiðsagnar kennara frá bæði Universitat Pompeu Fabra og Universitat Autonoma de Barcelona.

Önundur segir að námið hafi verið góður undirbúningur fyrir það starf sem hann tekur nú að sér. „Af því að í þessu námi fékk ég góða innsýn í grundvallaratriðin í þjóðhagfræði og líkanasmíð og tímaraðagreiningu, sem er mikið notuð í þjóðhagfræði. Svo fékk maður innsýn í peningamálahagfræði og mín lokaritgerð var á því sviði,“ segir Önundur. Hann hafi líka fengið góða innsýn í regluverk fjármálamarkaða og nýjustu skrif hagfræðinga um þjóðhagsvarúðarstefnu.

Önundur hafði áður starfað tímabundið hjá Seðlabanka Íslands áður en hann fór til Spánar í nám. Einnig hjá Hagfræðistofnun Háskóla Íslands og þar áður var hann blaðamaður hjá Morgunblaðinu. „Ég var blaðamaður 2007 til 2011, frá góðæri og fram í lungann af kreppunni. Og ég myndi bara segja að það hafi verið gríðarlega góður skóli. Maður hafi fullorðnast mikið og fræðst mikið,“ segir Önundur. Reynslan úr blaðamennskunni muni alveg klárlega nýtast í nýja starfinu og öllum þeim störfum sem hann muni taka sér fyrir hendur.

Helstu áhugamál Önundar eru veiði, bóklestur, þjóðfélagsmál og ekki síst kórsöngur. „Ég er meðlimur í karlkórnum Esju,“ útskýrir Önundur. Esja er ungur kór en hróður hans eykst sífellt. „Mér skilst það. Ég var náttúrlega fjarverandi í vetur en mér skilst að hróður kórsins hafi aukist mjög. Og hann hafi verið uppbókaður stóran hluta vetrar. Ég hlakka mikið til að fara á fyrstu æfinguna í haust. Við æfum einu sinni á viku, á miðvikudögum eftir vinnu,“ segir Önundur. Kórinn hefur aðstöðu í safnaðarheimili Háteigskirkju en Önundur segir kórinn þó ekki vera kirkjukór.